希望家己的未來親像浮出來的日頭：我欲做好囝

[bs-quote quote=”韓滿用親切的台語，將這本散文集號作「真情99」，向望逐家久久長長，攏會當用真情相對待，予人生美麗圓滿。” style=”default” align=”center”][/bs-quote]

大雨落甲 phik-phe̍h 叫，雷公霆甲 khinn-khenn 叫，阿蕊仔佇高速公路駛車，雖罔雨遐爾大，雖罔雷公爍爁予伊誠驚惶，毋過，想著阿雄仔這个後生，伊就啥麼攏毋驚，一直勇敢向前行。

坐佇車內的阿雄仔看雨捽仔捽甲雄戒戒 ，外口嘛是霧嗄嗄。伊想起過去、想著未來，希望這陣大雨會當共過去的種種洗予清氣，希望未來—希望未來莫予阿母操心。阿雄仔有幾若擺一直想欲看車窗仔外口，毋過一直看袂出去，毋知家己的未來佇佗位，敢會像車窗仔外口遐爾霧？

想著昨下昏暗假釋轉來到厝，阿母看著伊轉來歡喜甲目屎含目墘，閣一直講轉來就好、轉來就好！叫伊迒過烘爐火了後，隨捀一碗豬跤麵線予伊食，紲落?伊去公媽廳，先點三欉香共祖先稟報阿雄仔這个孫仔轉來矣，閣叫阿雄仔跪落來共祖先懺悔……，種種的動作，毋知已經做過幾擺囉！「希望這是上落尾的一擺」，阿雄仔佇心內共家己按呢講。

車駛落苗栗的交流道了後，一下仔就開始 peh 山，後來寬寬仔盤山，愈 peh 愈懸，這陣，雨沓沓仔較細，來到山頂尾溜的時，雨拄拄好停矣！母仔囝兩人坐車坐幾若點鐘，毋但真忝頭，心肝內嘛亂操操。毋過落車的時，欶一喙新鮮的空氣，跤仔手伸勻一下，煞看著目睭前是一大片開闊、清幽的山坪，閣有青翠、優美的景緻，兩人攏誠歡喜，原來遮就是『晨曦會』。阿雄仔敢若看著拄浮出來的日頭，嘛看著希望、看著未來。

輔導老師笑頭笑面請in入去會客室坐，閣倒茶請in啉。「老師拜託咧，阿雄仔後擺就望老師共伊牽教囉！」「這請你放心免煩惱！」李老師講解『晨曦會』的同學一工的活動，隨後就?in佇會內四界行行看看咧閣做導覽。

行來到橋頂的時，橋跤有鴨咪仔佇水裡自由自在泅過來泅過去，阿雄仔跤步就按呢停落來，誠細聲講一句「希望我後擺會當像鴨咪仔遐爾仔逍遙快樂」，行做前的老師佮阿蕊仔越頭過來，阿蕊仔講：「阿雄仔行較緊咧喔！」阿雄仔出力共鞋仔底的細粒石頭仔倒倒、敲敲出來，

伊嘛希望共心中的心魔擲掉、清掉，按呢頭前的路就會較順、較好行。

本文摘自《真情99》一書。

[taronews-styles book_title=”真情99″ book_author=”韓滿” book_publisher=”2019/04/24″ book_publish_date=”前衛出版社” book_cover=”https://cdn.taronews.tw/files/2019/05/12345-5ce3d2e27b732.png” book_link=”https://www.books.com.tw/exep/assp.php/taronews/products/0010819452?utm_source=taronews&utm_medium=ap-books&utm_content=recommend&utm_campaign=ap-201905″ book_link_text=”博客來購書” ext_link_1=”https://www.taaze.tw/apredir.html?155785702/https://www.taaze.tw/goods/11100874252.html?” ext_link_text_1=”讀冊生活購書” style=”book”][/taronews-styles]