芋傳媒 TaroNews - 台灣觀點.芋見真相

【支持東奧正名】毋免閣吞忍 體委會前主委楊忠和贊聲挺台灣(tâi語文)

圖片來源:進擊的台灣隊臉書粉專影片截圖

年底 ê 九合一地方選舉欲到矣,「公投縛大選」確定入案,除了婚姻平權以外,另外有一个重要 ê 議題是欲爭取「2020 東京奧運台灣正名」,希望莫閣用「中華台北」這个「龜怪」ê 名義出去比賽。不過,咱大多數台灣人對於這个議題以及伊 ê 背景亦閣無啥知影,所以這次專題專工邀請著體委會前主委楊忠和,欲來向咱逐家分享這个議題背後 ê 前因後果。

東奧台灣正名小組 9/3 繳出 526,688 份公投連署書。
圖片來源:進擊的台灣隊

受訪者:楊忠和 台北體育學院(台北市立大學 ê 前身)前校長、行政院體育委員會(教育部體育署 ê 前身)前主委

芋傳媒記者簡翊展採訪整理

 

Q:汝對用中華台北作隊名參加比賽這件代誌有啥物感受 kah 看法?

A:啥物叫做中華台北,我到這馬嘛無了解,伊代表啥物意義我嘛毋知,伊是焉怎來 ê,一手資料咱到擔嘛毋捌看過。咱作為一个選手、一个教練,用一个咱根本就毋捌,甚至是生疏 ê 名稱去比賽,啥人心肝底會感覺爽快?咱用一个奇怪 ê 名 kah 人比賽,就算講得真好 ê 成績,咱『氣持ち』敢會好?

 

Q:汝敢捌穿過台灣隊 ê 球衫出去參加比賽?

A:其實我是自 1994 年開始 tshuā 隊去國外參加比賽,就攏是用中華台北這个名,穿這領球衫去到國外 ê 時陣,人攏足好奇,會問汝講中華台北是置佗位?in 從來毋捌聽過這个名,地圖去掀嘛揣無中華台北,汝解釋歸晡人嘛聽無啥有,甚至當作汝是附屬於中國 ê 台北,咱就愛解釋歸晡,人攏聽無,尾仔直接講台灣,人就知影矣!穿中華台北 ê 球衫咱心肝底無爽快,人外國人嘛攏看無。

楊忠和老師在公投連署期間受訪。
圖片來源:進擊的台灣隊臉書粉專影片截圖

Q:汝感覺用台灣作隊名參加國際比賽有啥物優點 kah 好處?

A:咱台灣這个名稱是已經幾囉百年矣,歐洲、美國 kah 非洲攏知影台灣。頭一个好處,用台灣 ê 名出去比賽 tsiah 會使國際化,看著汝 ê 名就知影汝是對佗位來 ê。

第二个好處,國際奧會叫做「IOC」,這六十幾年來就是希望咱愛叫「Taiwan」毋通用「ROC」,汝若用「ROC」中華民國,汝 ê 領土包括著中華人民共和國、蒙古以及中亞 ê「Kyrgyzstan」kah「Tajikistan」,所以今仔日咱若硬欲用中華民國,這四个國家一定會來 kah 咱抗議嘛,汝若用中華民國,人「IOC」就未接受矣,變作增加「IOC」ê 困擾,伊無辦法 kah 彼四个國家解釋嘛,閣來,國際奧會有家己 ê 憲章嘛,第三十條內底就特別焉爾寫:汝一个代表隊,汝 ê 名稱愛有法度反應著地理 ê 名詞。所以咱用台灣是理所當然 ê 代誌!

東京奧運台灣正名運動的台灣隊隊徽,由設計師陸六設計。
圖片來源:進擊的台灣隊臉書

台灣隊隊徽設計始末

台灣是一個位處東亞、太平洋西岸的重要海島國度,而什麼樣的符號能夠充分傳達一個海島國度的精神呢?很自然的,我們想到了鯨豚類。在決定選什麼的過程中,曾考慮過台語俗稱「媽祖魚」的海豚,但他們實在太可愛,和我們想像的隊徽所強調的堅毅、對抗精神有些落差。所以我們考慮選擇鯨魚。但,鯨魚種類那麼多,到底要用哪一種鯨魚呢?

我接著去請教了一位熟悉東部海洋生態的朋友,她告訴我,近年花東最常看到的鯨魚是抹香鯨、喙鯨。但當我問到說,如果以鯨魚作為一個象徵來自海洋國度的運動隊伍,她覺得什麼鯨魚最好?

她很直覺的告訴我:「大翅鯨」。她說,因為大翅鯨有一種「家庭」的感覺。

當下我們都覺得:「有喔,中了。」

(引用來源:進擊的台灣隊

Q:汝支持東奧正名台灣 kah 家己本身 ê 國族認同敢有關係?

A:我先分作兩个層次來講,第一个就是一个名 ê 問題,中華台北是啥物貨?這是一个真無格 ê 名稱,嘛毋捌經過民意 ê 同意,這个名稱是啥人決定 ê?是啥物時陣決定 ê?彼時猶是戒嚴時期,敢有無民意?無嘛!決定這个名稱 ê 人,遮 ê 人平均攏百幾歲矣,人置天國抑是地獄我是無知,但是攏無置這个世間矣,這个名稱實在是誠無道理,恁遮少年 ê 敢願意予汝根本毋捌看過 ê 人來決定恁 ê 運命?而且 1981 年到擔嘛三十外年矣,咱這馬敢未使重新來決定咱家己 ê 名?

像我叫做楊忠和,人叫我 ê 名我就會共應,人若烏白叫一聲阿狗、阿貓,汝敢欲共應?汝當然未接受嘛,若准講汝真正予父母號名叫阿狗,汝嘛會使去戶政事務所改名嘛!「IOC」嘛無規定講會員國未使改名 ê 嘛!不管是協議抑是啥物規定攏會使重新參詳 ê 嘛,現代社會 kah 這个世界就是民主社會、講道理 ê 世界嘛!

續來,國族認同 ê 部分,我是毋捌做過調查啦,但是照我看著、拄著 ê 狀況看來,會關心正名 ê 人,應該嘛是介關心國族、民族意義 ê 人啦,像我家己就是認同台灣嘛,啊中國本底就毋是咱 ê 嘛、咱嘛毋是伊 ê,像菲律賓 kah 米國我嘛誠甲意,但是咱這馬就只有一个台灣爾,咱主權到佗一位就是佗一位嘛!所以我既然徛踮遮,我食遮 ê 米大漢,我就是認同這片土地嘛,我想……佔大多數 ê 台灣人,咱 ê 祖公仔,可能是對廣東、對福建來 ê,但是咱這四百年來受著無仝款 ê 殖民者統治,咱 ê 文化 kah 認同嘛已經 kah 遐無相仝矣,已經等於變作一款新 ê 民族矣,咱台灣人真正就是 kah 人無仝嘛!

楊忠和老師積極參加正名運動
圖片來源:進擊的台灣隊臉書粉專影片截圖

Q:紀政講假使改名作「ROC」,伊嘛會使接受,汝敢會接受?汝會焉怎看這件代誌?

A:我已經講過嘛,若是「ROC」就會 kah 四个國家衝突,但是人若願意共 in 兜 ê 所有權狀予汝,汝敢會無愛?但是若「ROC」真正有效,若「ROC」置世界行會通,in 敢會去予聯合國踢出來,1980 年代敢會閣予「IOC」要求改名?「ROC」就是已經行未出去矣,「行不通了嘛!」

這个「ROC」若是國際奧會會使接受,我家己欲反對嘛無效嘛,問題現實上就是 kah 太濟國家衝突著嘛,「ROC」就已經是行未出去矣嘛,咱台灣愛國際化啦,毋通閣「故步自封」,莫閣家己置騙家己矣。

 

Q:紀政進前講支持正名 kah 支持台獨是無仝款 ê 代誌,請問汝 ê 看法是?

A:事實就是焉爾,正名 kah 台獨是兩回事啊,台獨是愛去聯合國申請 tsiah 會使獨立嘛,但是汝領土無欲改變,堅持欲中華民國汝嘛是請未入去!『疆域』kah 主權 ê 宣稱無改,汝去『IOC』抑是聯合國攏嘛未過。啥物叫做台獨?中華民國嘛是一種『獨』啊,只是講汝領土無欲改變,進前馬英九講欲『返聯公投』,人哪會有可能予汝『返聯』,中華人民共和國 kah 蒙古敢會願意做汝 ê 細漢 ê?今仔日咱只是欲置『IOC』正名,kah 獨立完全兩回事嘛!

眼球中央電視台設計中華民國隊應援圖。
圖片來源:眼球中央電視台 臉書

Q:通常台灣多數運動員『服從性』較懸,相對就較欠缺『批判性』,汝做為一个運動員為啥物會去思考中華台北這个問題?

A:早期做運動選手 ê 人,攏是出身置經濟上相對較弱勢 ê 家庭,做選手是為著比賽為著生活 kah 獎金,心思就攏囥置比賽 kah 提牌,教練焉怎講就焉怎好,提牌變成逐家上要緊 ê 代誌。因為就敢若像『在人屋簷下』,所以相對『服從性』就較懸,較早閣加上是戒嚴時期,逐家攏毋敢討論。

我是較早厝內底有討論,加上大學了後看著中華台北 ê 過程,所以我算是誠早就知影這件代誌,這就置咧騙人嘛,彼時政府閣共選手講這中華台北是對選手 ê 保障。啊講實在這个中華台北就 kah 香港仝款矣,咱予人鎖入去中國 ê『脈絡』矣,這是真『羞辱』ê 一个名稱嘛!

 

Q:汝敢認同『體育歸體育,政治歸政治』?

A:體育是學校體能教育 ê 意思,運動就是運動,毋是體育,體育是 Physical Education、Sports 是運動。咱應該愛講運動,毋是體育。

啊我認為若是有讀冊 ê 人,無人會去認同這句話啦!運動 kah 政治本來就是『一體的兩面』,汝講欲焉怎去『切割』這兩个物件,『運動歸運動,政治歸政治』這是『弱勢』tsiah 會去講 ê 話啦,汝今仔日若是一个較『強勢』ê 人哪會去講這囉話,這就未輸一个無實力 ê 人去參加比賽,比賽輸矣去講彼句『我志在參加』,彼就是一種足『阿Q』ê 想法嘛,運動 kah 政治是欲焉怎『切割』啦!人較強、較大 ê 國家未去講這囉話,一寡人口比台灣較少 ê 國家嘛未去講嘛!

創作者 Nagee 藉創作諷刺「體育歸體育,政治歸政治」的謬論。
圖片來源:nagee 臉書

Q:有人講若是公投過矣,嘛無一定真正會使成功正名,參賽權益嘛會受著影響,為啥物汝亦是堅持支持公投?

A:啥物人講未使?啥物人規定講未使?假使咱十一月二四公投通過了後,續來就是按照『IOC』規定 ê 『程序』嘛,台灣 ê 奧會就愛去申請,共國際講咱這个公投、咱兩千三百萬人決定講欲改名,去走這个『程序』。當然若欲『IOC』通過,就是愛靠內底一寡挺汝 ê『盟國』嘛,只要有有夠大跤 ê 國家欲挺汝,汝這正名就會過嘛!

話講倒返來,中華台北這个見笑 ê 名,咱這三十七年嘛攏忍矣,咱就公投先予過,上介好就是 2020 咱就正名,萬一中間若有啥物狀況,咱所有 ê 台灣人就應該閣較團結嘛!作伙用咱 ê 智慧 kah 意志,尾仔咱就一定有法度正名嘛!上介重要就是:敵人是家己,毋是別人啦!毋免遐緊去予人『分化』啦!

有 ê 人刁工放風聲講:咱若正名落去,選手 ê 權益會受著影響,咱 ê 會籍會去予人取消。我想欲問 in 一句,啥物人講會籍會予人取消?『IOC』佗一條規定講申請改名就愛取消會籍?敢有這條?無嘛!講遮 ê 話 ê 人就是一支喙置放嘛!

正名就正名,有啥物影響?咱就攏照規矩來啊!ˊ我嘛毋是講去開槍抑是拍飛彈啊!咱若是用暴力、非理性焉爾 tsiah 會講予人『除名』嘛!唯一捌予人『除名』 ê 只有國民黨,國民黨 1970 年代去予『IOC』『除名』,彼時國際上規定講愛用『Taiwan』嘛,國民黨就硬欲堅持用『ROC』,這就『涵概』著中華人民共和國 kah 蒙古嘛,所以人『IOC』就講未使,但是國民黨就硬欲改啊,進前閣捌拿牌仔置『Olympic』開幕 ê 時順抗議,後來幾屆鬧到尾仔人就共汝『除名』嘛!

咱今仔日嘛毋是用過去國民黨彼套野蠻 ê 步數嘛,我就真正足簡單焉爾,欲用『Taiwan』嘛,嘛照 『IOC』ê 規矩,就是改一个名、足單純 ê 代誌嘛!

1960 年羅馬奧運,中華民國代表隊舉牌抗議,反對以 Taiwan 為名參賽。
圖片來源:歷史照片

Q:汝進前講演 ê 時陣講過『洛桑協議』可能有『密約』,這个『密約』大概是啥物狀況?

A:當初時我是講我懷疑有『密約』啦!因為彼當陣國民黨講『洛桑協議』了後就未使改名,講咱若閣改名就會違背著彼,但是彼个內底就無任何一條規定講未使改名,嘛無講改名就愛除汝 ê 會籍啊!莫非是另外閣有『密約』嘛?我是焉爾懷疑啦,因為條文內底攏無規定講未使改名,抑是講改名就愛開除會籍,完全攏無啊!我就想講奇怪,既然無條文規定,哪會閣有人出來放話?除非講閣有『密約』嘛!

 

Q:面對一寡對「中華台北」雖無滿意但是會使接受 ê 人,汝敢有啥物話欲向 in 講?

A:我想是焉爾啦,按統計上看來,一个社會內底當然有各種 ê 看法啦,有 ê 人講雖然無滿意、但是會使接受中華台北,這畢竟是少數人啦,有可能就是像頭前咱講 ê,去受著遐放風聲 ê 人 ê 恐嚇 kah 影響嘛,所以伊就感覺講這个改名,徛置選手 ê 立場置想,當作改名會去影響著選手 ê 權益。

我是希望遐放話 ê 人應該愛加讀一寡冊,揣看有佗一條規定講改名會害選手 ê 權益受著影響?我認為放話 ê 人道德上有較差,嘛愛去加讀一寡冊,講一寡較有詳細 ê 話,毋好閣繼續置遐恐嚇,其實恐嚇嘛是愈來愈無效矣,咱台灣人是足巧 ê,台灣人敢遐簡單去予 in 欺騙?

所以講今仔日上介重要就是講,這个中華台北 ê『前世今生』一寡資料,希望國民黨會使提出來,予所有 ê 人來看,一个民主 ê 時代,就是像華語置咧講 ê『透明化』,講較白就兩字啦,真相!真相愛予咱知影,這 tsiah 是上介重要!汝毋通崁來崁去、恐嚇東恐嚇西嘛!遐 ê 攏白漆 ê 嘛!

楊忠和老師、公投發起人紀政及運動領域人士一同為正名發聲。
圖片來源:中央廣播電台

最後,楊忠和老師嘛分享家己對中國打壓 ê 看法,楊忠和表示講,其實較早無人置咧拚正名 ê 時陣,咱用中華台北仝款會予中國打壓,中國 ê 打壓從來毋捌停過,像這次台中『東亞青運』,中國算是東亞奧會 ê 主人,伊決定講無欲予汝辦,蒙古、北韓 kah 香港、澳門替伊拿手,咱就去予取消掉矣,逐家攏無比賽通比矣。咱今仔日拄著壓霸 ê 厝邊,台灣人應該愛覺悟!但是最主要國際奧會 kah 東亞奧會無仝,東亞多數會員是予中國掌握去,但是『IOC』是全世界 ê,內底是歐洲佔大宗,歐洲各國是文明、民主 ê 民族嘛,進前蔡英文嘛捌透過錄影置歐盟議會演講嘛!『IOC』是歐美置咧岸盤 ê,in 一定是照規矩來 ê,若准講無欲予咱正名,in 一定會解釋理由,無可能因為咱欲正名就共咱 ê 會員資格挽掉,這是無可能 ê 代誌嘛!未像中國遐土匪啦!

(『』內底 ê 詞表示是日語、華語 kah 英語,其他漢字 ê 用法閣請逐家多多指教,碌力!)

延伸閱讀:

邀請您加入「芋傳媒」的粉絲專頁
我知道了
評論
Loading...